سمكه اللوت

 

أعضاء الجروب المحترمين

زى ما اتكلمنا عن القاروص وكل ما يتعلق به وبفنيات الصيد عليه
ندخل بقا على تانى سمكه وهيا سمكه اللوت
سمكه اللوت يطلق عليها الصيادين سمكه تنحه لأنها جامده جدا فى المياه اجمد من القاروص
وهيا سمكه ليلية وساعات تعلم معانا فى النهار وسمكه شتويه وموجودمنها نوعين نوع أسمو شفش ونوع أسمو لوط الشفش اللوط الصغير أما الكبير لوت
يفضل الشغل عليه طبعا بالفله المجنونه ساق واحد بالمكنه طبعا والطعمايه المفضله لللوت هوا الدفاس أو الجرنجو أو الحنش ودا كلو اسم لنوع واحد ويفضل لما تطعم الحنش تقص حته من الديل علشان ميدفس نفسة فى الرمله أماكن تواجدو بكثره ميناء أبو قير مثلا على رصيف 3 وميناء بتروجيت وأدكو ورشيد

الأيام دى الللوت بتدخل على الجمبري الحى والقراص والمشرشر وفى أحواض الكهرباء بيشتغلو عليه بالجمبري بالمكنه جمب البلوفه بتاعه الحوض واللوت ممكن يوصل حجمو 6 أو 7 كيلو وأكثر كمان
دى معلوماتى المتواضعه عن تجارب شخصية ودون نقل من أحد
طبعا انا على حد علمي كتبت ومن اجتهاد شخصى وطبعا فى ناس تعرف اكتر منى كتير بس الحمد لله الواحد بيجتهد وكل يوم الواحد بيعرف عن اليوم إلى قبلة والحمد لله إلى بعرفه بحاول أوصلو لكل صياد بطريقه بسيطه

اه نسيت الشعر يكون 40 والسلاح من رقم 1 حتى رقم 4
وبكدا أكون خلصت على قد علمى سمكه اللوت وان شاء الله استنو منى معلومه عن سمكه تانيه من أسماك المتوسط

اخوكم إيهاب أبو مريم